Mayhem

Mayhem qu'ei un grop norvegian de black metal. Qu'ei un deus grops fondadors d'aqueth estil. Qu'an causit l'anglés per lenga d'expression artistica.

Biografia

Las originas

Lo grop que's formè en 1983. Los purmèrs membres que n'estón Destructor (àlias Øystein Aarseth, guitarrista, qui's hasó mei tard aperar Euronymous), Messiah (àlias Eirik Nordheim, cantaire), Necrobutcher (àlias Jørn Stubberud, baishista) et Manheim (àlias Kjetil Manheim, trucaire). Qu'ei dab aquera formacion qui enregistrèn las loas duas purmèras maquetas, puish que sortín lo lor purmèr disc vertadèr : Deathcrush, dab lo cantaire Maniac (Sven Erik Kristiansen), qui remplacè Messiah. Lo tiratge d'aqueth disc qu'èra limitat a 1000 exemplars mes que's venón pro viste. La musica qui perpausava qu'èra ua mena d'ultra-speed metal (au sens on volèn jogar enqüèra hòrt mei viste que los grops d'speed metal), influenciat per Venom e Bathory mes tanben peus purmèrs grops de death metal, hòrt marginaus a l'epòca. En 1988, Manheim e Maniac que se n’anèn deu grop : lo purmèr que's trobè un tribalh vertadèr e lo segond que ho internat dens un espitau psiquiatric per'mor d'aver hèit ua temptativa de suicidi. Que hon remplaçats per Dead (Per Yngve Ohlin) au microfòn e Hellhammer (Jan Axel Blomberg) a la bateria. Qu'ei dab aquera formacion qui hasón lo Live in Leipzig e lo live piratat Dawn of the black hearts. Mes en abriu de 1991, Dead que's suicidè. Abans d'aperar la polícia, Euronymous, qui trobè lo còs, que'n prenó fòtos. Ua d'aqueras fòtos que's retrobè sus la pocheta deu disc pirata Dawn of the black hearts.

Pauc après, Euronymous e Hellhammer qu'enregistrèn un album qui influencè hèra de grops : De misteriis dom Satanas ("Los rites secrets deu senhor Satan"), considerat per mei d'un com lo lor cap d'òbra. Sus la pocheta de l'album, que vedem sonque aqueths dus musicians mes la guitarra baisha qu'estó enregistrada per Count Grischnack (Varg Vikernes, unic membre de Burzum) e la votz per Attila Csihar (cantaire ongrés, membre deu grop Tormentor). En 1993, abans que sortisse l'album, Vikernes que tuè Euronymous (Øystein Aarseth) per rasons de las escuras. De Misteriis qu'estó donc un disc postum d'Euronymous. Per quauques ahogats deu grop, Øystein Aarseth que n'èra l'auna. Dab la soa mort, Mayhem que's moriva tanben. La familha d'Aarseth que demandè aus membres deu grop qui demoravan de boishar las partidas de baisha enregistradas per Varg Vikernes mes arrés ne'us responón pas.

Après Euronymous

Quauques annadas puish, Mayhem que's tornè formar dab Necrobutcher a la guitarra baisha, Hellhammer a la bateria, Maniac aus vocaus e un navèth membre, Blasphemer (Rune Erickson) a la guitarra. Quauques ahogats de la purmèra òra que digón qu'aquèra arre-formacion avè per tòca de profieitar de la celebritat qu'Euronymous e Dead avèn autrejada au grop e au black metal per las loas morts violentas e peus incendis de glèisas qui avèn hèits (un reportatge qu'estó realizat per la television norvegiana sus aqueth subjècte) entà ganhar moneda aisidament. Los membres actuaus deu grop n'ac denègan pas mes en hant ua musica black metal dab conviccion que s'an sabut ganhar l'estima d'un public navèth.

La "legenda" de Mayhem

Après la mort d'Euronymous, Mayhem qu'avó ua celebritat hòrta e immmediata. Çò qui hè que los ahogats de black metal, qui aiman lo sensacionau morbid, que parlèn e desparlèn hèra suus membres defunts deu grop. Quin destriar, ara, la vertat de çò d'exagerat o de completament faus?

Dead

Capvariat e obsedit per la mort, qu'auré avut, a un moment dat, un corbaish mort dens lo son sac e que l'agradava de'n sentir l'aulor. Que's pareish tanben que li apariva d'enterrar la soa harda pendent mes dens un cemitèri, abans los concèrts, entà qu'ajan l'aulor deu poeirumi. Qu'èra esquizofrèn. Las balas qui servín a tuà'u que serén un present d'anniversari qui li auré hèit Varg Vikernes (los dus qu'èran caçaires). Vikernes que seré donc responsable de la mort de dus membres de Mayhem.

Euronymous

Çò qui ei aperaquí segur qu'ei qu'estó eth, Euronymous, qui prenó las fòtos de Dead après lo son suicidi (los dus òmis que vivèn amassa e qu'estó eth qui aperè la polícia).Çò de segur, tanben qu'ei que hasó partida de l'Inner Circle, deu "Cercle Restrent", aqueth deus gavidaires de l'organizacion terrorista qui brutlè mei d'ua glèisa de husta en Norvègia e qui miacè de mort mei d'un musician de metal qui ne partejvan pas las loas conviccions anticrestianas o qui las partejavan mes non pas dinc a passar aus actes. Per contra, e cau créder que prenó tròç deu cran de Dead entà'n har un colar? O ei d'un colars dont un que l'auré auhèrt a Hellhammer? E cau créder que mingè tròç deu cervèth deu mort entà reprodusir un rite deus vikings? De segur, qu'estó suspectat de l'aver tuat mes l'enquista de la polícia que l'innocentè.

Maniac

Omi de scèna carismatic, qu'avè per costuma de's nafrar lo pitre sus l'empont dab un cotèth. Mensh morbide que Dead, be hasó ua temptativa de suicidi mes que ditz adara qu'èra ua error de joenesa e qu'ei content que lo son hrair e l'avosse sauvat. Segon la Wikipèdia francesa, qu'ei glossofòb: valent a díser qu'a paur de parlar en public. Per'mor d'aquò que s'embriagava tostemps abans de pujar sus l'empont. Dinc au dia on, hart penut, e seré estat incapable de's brembar de las paraulas. Blasphemer que l'auré tirat de l'empont de fòrça e remerciat deu grop. Despuish ençà, qu'an tornat préner Attila Csihar, un vocalista ongrés qui avè ja cridat dens Mayhem mes qui n'apareish pas que suu live Mediolanum Capta Est.